एक गार को घड़ो अर पीतळ को घड़ो नन्दी क तीरां घांट प धर्या छा। नन्दी का झरणा न घड़ा ई नन्दी म खांचल्या। अर व्ह नन्दी म बअबा लागग्या। गार को घड़ो पाणी की लाम्‍बी-लाम्बी लअरां न देखर घबराग्यो। पीतळ का घड़ा न ऊंई घबरायो देखर। ऊ वांई टांढस बंधाबा लाग्यो। क घबराव मत कस्यो बी दुख आजावै उम म्हूं थारी मदत करूं। तो भापड़ो गार को घड़ो डरपर बोल्यो। म्हन ओर कोइ को बी डर कोइन जतनो थारो डर लागर्यो छै। ई ल्य तू मसूं अतनो दूर चलजा जतनो तू जा सक छै। तो पीतळ का घड़ा न की तू अस्यां खामी कैर्यो छै। आपण तो एक दूसरा का भाईला छां। फेर गार को घड़ो बोल्यो देख म्हूं तो गार को छूं। अर तू पीतळ को छै। अर आपण दोनी भड़पटां खावंगा तो टूटणी तो मई पड़ैगो। क्यूंकी म्हूं तसूं नरम छूं। ई ले म्हूं तसूं कैर्यो छूं क ये पाणी की लाम्बी-लाम्बी बडी लअरां आपण दोन्या न भड़ा देगी। तो म्हारो कांई होवैगो। जद जार पीतळ का घड़ा क समज म आई अर ऊंई ऊकी मदत करबा का हस्याब सूं गार का घड़ा सूं दूर चलग्यो। अर दोनी सई सलामत बतार्या।