एक टैम की बात छै। गोतम बुद न वांका चेला क लारां एक गांऊ म डेरा लगाया। जस्यांई चेला गांऊ क मलाडी फरबा ग्या तो। ऊ गांऊ का मनख्यां न वासूं आछी-बरी बातां खी। चेलां न गांऊ हाळा क अदर्यास रोस आग्यो। अर पाछै-पाछै बुद क गोडै आग्या। बुद न वांसू पूंछी भाई कांई बात छै। थान कस्यां मुण्डो लटका मल्यो छै। असी कांई बात होगी। अस्यांक म एक चेलो बोल्यो आपणई यांसू चालणी छाव छै। ज्यां आपणो मान-समान न होवै। यां तो मनख्‍यां को ब्वार छोको कोइन। बुद माराज हांसर बोल्या। थां या बात कस्यां कै सक छै। क दूसरा गांऊ म थांको बड़्या मान होवैगो। फेर दूसरो चेलो बोल्यो कम सूं कम यां सूं छोका मनख तो मलैगा। बुद बोल्या क गांऊ ई छोडबा को मल्लब यो छै क यां का मनख बड़्‍या कोइन। अर अस्यां बी आपण तो सन्त मात्मा छां। आपणो तो काम छै बरा मनख्यां न छोका करबो। वांई छोका मनख बणाबो। ईक लेक आपण कतांई वांको खोटो ब्वार सूंणनी पड़ैगो। आखरी म वांइ सूदरणी पड़ैगो। फेर बुद न सन्दा चेला न बठाणर अर समझाया अर वासूं की या मनख्यां न आपण बड्‍या पराणी बणावंगा। तो एक चेलो बोल्यो ऊको नाम आणन्द छो। क गरुजी या बताओ ऊतम पराणी किसूं कै सक छै। उम कांई गुण होणी छाव छै। तो ऊंकी बात सूणर बुद न बताई । क जस्यां युद्ध का मेदान म हाती लड़ाई म चालतो जाव छै ऊंकै कतनाई तीर लागै। पण फेर बी ऊ ठरै कोइन ऊको दुख ऊई जाणै छै पण फेर बी ऊ चालतो रै छै भलाई सूं ऊंकी मोत बी होजावै तो बी ऊंकी चन्ता न रै। ऊ छावै तो मेदान मसूं भाग बी तो सक छै। पण ऊ अस्यां न कर सक। तो उसूं बड्‍या पराणी कै छै। तो वांकी बात सूणर सन्दा चेला न वांसू जाबा को फेसलो बदल द्‍यो।