एक टैम कागलो अर एक हरण छो। व्ह दोनी पक्‍का भाईला छा। व्ह अस्या छा। क ज्या बी जावै वां लारां-लारां जावै छा। दनरात लारां रै छा। व्ह एक दन दोनी बछठ ग्या। अर एक दन हरण ई गेला म एक स्वाळ्यो मल्यो। उनै ऊंकी मीटी-मीटी बाता सूं हरण ई भाइलो बणाल्यो। अर व्ह ज्यां बी जावै वां लारां-लारां जाबा लागग्या। एक दन कागला ई तोल पड़्‍यो तो कागला न हरण सूं खी, क यो स्वाळ्यो थारी नाइ कोइन पण हरण न ऊंकी एक बात न मानी। तो एक दन स्वाळ्या न हरण सूं कि एक माळ म भळ्डा खाबा चालां। व्ह एक दन जाता-जाता नतकेइ भळ्डा खाबा जाबा लागग्या। एक दन माळ हाळा ई तोल पड़्यो। क ये भळ्डा कूण खाव्ह छै। उनै एक दन सन्दा माळ म एक जाळ बछाद्‍यो। दूसरै दन दोनी भळ्डा खाबा आया। अर हरण जाळ म पसग्यो। पण स्वाळ्‍या न ऊंकी जाळ न काटी अर खबा लाग्यो। यार भाईला म्हारै आज दितवार को बरत छै। अर या जाळ चामड़ा की बणी छै। म्हूं ईं आज क दन न काट सकूं। आज कस्यां बी करैर दन खाडदै। काल जरूर काट द्‍यूंगु। अस्यां कैर दड़ा क पाछै बअठ्ग्यो। अर हरण की मरबा की बाट नाळबा लागग्यो। थोड़ी देर पाछै कागला ई तोल पड़ी। ऊ भाग्यो-थक्यो हरण क गोडै आयो। अर खी क भाइला तू कस्यां पसग्यो ई मसीबत म। हरण न सन्दी बात बताई अर खबा लाग्यो कास थारी बात म्हन मानी होती तो यो दन आज म्हन देखणी न पड़तो। कागला न की फकर मत करै। अब म्हूं बताऊं जस्यां करजे। माळ हाळो आताई अस्यां आडो पड़ जाजे जस्यां तो थारा सांस रूकग्यो हो। ज्योंइ ऊ थन मर्यो समझर जाळ समेठगो। अटी जाळ समेठतांई म्हूं कांऊ-कांऊ करूंगुं। म्हूं बोलता ई तू उठर भाग जाजे। ठीक छै। अतनांक म मालहाळो आयो हरण ई मर्यो देख जाळ समेटबा लागग्यो। ऊटी कागलो बोल्‍यो अटि हरण उठर भागग्यो। माळहाळा क गोडै कुराड़ी छी। उनै ऊ कुराड़ी की फांकर दी। पण हरण क तो न लागी। अर स्वाळ्यां क खान्दा प जा पड़ी। स्‍वाळ्‍यो वांई मरग्यो। अर हरण बचग्‍यो। कागलो अर हरण दोनी पक्‍का भाइला बणग्या।

• दितवार को बरत करता, न काटी छी नाड़ी॥
  कागला न ज्यान बचाई स्वाळ्या क कान्‍दै जापड़ी कुराड़ी॥