सावण को मीनो चालर्यो, आयो तीज को थ्वार।
बरखा राणी सूं हड़बाटेस, दोन्यां को बगड़्यो ब्वार।
हींदा खाबा की रूत चालरी, नतकेइ ओळमा देवै सास।
करम खोड़ली आई बींदणी, आतांईं पटक्यो ईनै काळ।
बरखा राणी फूटा मल म, तोड़री वा सूखा गास।
पाणी बरसै तो आवै नूरांणी, मरती फसलां क सास।
आसोज की नाई तपर्यो, मोसम होग्यो सन्दो साफ।
खास्तकार को जीव मुट्ठी म, उगी साख न आरी ज्याफ।
अस्या तावड़ा न नातै मल दो, परणों पाणी की पणिहार।
धरती माता की तस मटै, जीऊ बावड़ै मरती साख।
रोती फरती आवै बादळ्यां, तोड़ जावै सन्दी आस।
खां तोड़ी करां यांका न्वारा, मोसम बंणग्यो घाघ।
उमस की मारी चोवै पसीनों, तन बदन म लागै आग।
कंचन काया खतीर बणगी, भर्या जोबन फूट्यो भाग।
- तरक माण्डो