जूता-चपलां की मईमा भारी, कांईं पुरूस अर कांईं नारी।
पड़्या-पड़्या बळ खावै भापड़ा, कुण करै यांकी रूखाळी।
ढेर म यांकी दसा मल जावै, जोड़्यां होवै नाळी-नाळी।
एक बार असी बणीं म्हासूं, जीमबो पड़ग्यो सा भारी।
ठाटा सूं जीमबा म रैग्या, जूतां की कुण करै रूखाळी।
ऊबाणा पगां की नोबत आगी, जूता फअरग्यो कोई मवाली।
छारूं मेर आछ्या हेर्या म्हानै, सन्दी आडी नजर घुमाली।
म्हारा मन न मारी उछाटां, दूसरा की पगां म वाळी।
जूता सांटे चपलां फेरली, मरद का बदला म नारी।
अतना म वांको धणीं आग्यो, पाछै सूं बोल्यो राम राम।
सरम की मारी मरग्यो म्हूं तो, बणग्यो नपट अनजांण।
झट खोली चोरी की चपलां, मूंडा प लायो मुसकान।
थांकी फैरबा म आगी बाळी, संभाळो चपलां सरीमान।
घणी निठां सूं म्हांनै झेंप मटाई, आच्छी करी रै भगवान।
आछ्यो रैतो ऊबांणो आ जातो, पांच मनक्यां म गम जाती आंण।
आच्छी करी रै करतार म्हारा, बगड़ जाती भाया सन्दी सान।।
- तरक माण्डो