बापू रोवै बुढापा की लाठी, तोड़ग्यो थू म्हारो गुरूर।
खांदो देतो म्हारी अरथी न, थू सेवा कर तो भरपूर।
सेजां सूंनी करग्या साजन, सुहागण्यां रोवै सिंदूर।
बीच म बपता आई, ब्याज नअ छोड़ग्या मूळ।
मायड़ रोवै ऊंकी ममता न, म्हनै कर्यो कांईं कसूर।
क्यूं बिलखती छोड़ग्यो बेटा, कस्यो निभायो दस्तूर।
फचाटां खार रोवै मां जायो, भाई को कमळायो नूर।
अंणबोल्यो ई चल्यो गयो रै, थू करग्यो म्हानै मजबूर।
बैण रोवै भाई की कळाई, सपनां होया चकनाचूर।
खींकै बांधूंगी अब म्हूं राखी, बीराजी ग्या घणां दूर।
खूंका लाड लडावगी भावज, देवरजी बच्यार करता जरूर।
सोभाग्य की सुंण गेली होई, रोबा सूं आंख्यां गी सूज।
बावळी बातां मत करो था सन्दा, रब न अरजी करी मंजूर।
धरती क लेकै छोड़्या सन्दा, जीसूं आयो थां सबसूं दूर
मायड़ भलांईं रै जाजे निपूति, जंणे तो जंण ज्ये अस्या सूर।
खुल्ली छाती लड़्या धड़ाका सूं, दुसमण नअ चटाग्या धूळ।।
- तरक माण्डो