बरदान आंवळो, सन्दी तरकार्यां को वजीर।
कड़वो लागै सा करेलो म्हांनै, कर्यां क खटाई की जागीर॥
भट्टो खावां बड़ा चाव सूं, करूंदो बी करी को बीर।
केदार कद्दू दोन्यूं फाईदाबन्द, कांदो लावै आंख्यां म आंसूं।।
आलू का ठाठ निराळो, लेबा वाळां की नतकेइ भीड़।
नींबू नारंगी आमली मोसमी, सामनै हाळा न करै परेसान।।
देखतांईं मूंडा म पाणी आवै, कुण समजै दूसरा को दुख।
टिंडा टमाटर कांकड़ी खीरा, भिंडी गोभी मटर करे गंभीर।।
गिलकी थरोई ग्वांर फळ्यां, केर सांगरी लसण मतीर।
बाथळी खुंणीजरो डांडी चंवळो, हरा धणो को सन्दा म सीर
मेथी पालक मूळी गाजर, स्याग की छै लंबी लकीर।
हळदी अदरक चीकू सेब, नासपति अनार हर ले पीर।
घणो रसीलो आम पाको, कटेळ गरीबां सूं कोसां दूर।
अंगूर पपीतो जामुण तरबूज, स्याळा को सहजादो खजूर।
फळ तरकारी की होगी बातां, ये सन्दी पोसटीकता सूं भरपूर।
रूत गुण देखर काम म लीज्यो, खिल जावै मुखड़ा को नूर।।
- तरक माण्डो