फर फर पाचो आर्यो नतकेइ, करोनो कतनों बेमान।

घणीं तपाई दुनिया बरी न,  हाल तांईं यो खार्यो पराण॥

फूटी आंख्यां सूं बी न्ह स्वार्या, घर न आबा वाळा मेमान।

सन्दा ज्याग का घूरबा लागै वानै, फीकी पड़ जावै मुस्कान॥

सन्दा की आख्यां म खटक जावै, बारै आवै जद कोई मनख।

आबा वाळा को सतकार बंद छै, पाछो जावो करपा निदान॥

मूंडा बांध सन्दा घरां म बैठ्‍या छां, नाकां प कर मल्यो ढकांण।

नाक मूंडा सन्दा एक होग्या म्हांका। खुला राख मल्या छै कान।

हात धोतां मटी हथेळी की लकीरां, कांईं लेखो मांड्‍यो भगवान।

नोकरी करबो मुसकिल करद्‍यो, आफत म अटकी म्हांकी जान।

आबा जाबा को भारी संकट होग्यो, मनख मार रोगड़ो खींचर्यो टांग।

साऊदानी तो बरत्यां ई सरेगी साब, करोनो पीर्यो मनक्यां का पराण।

कद आवैगी कोरोणां की मढ़ाई, कस्यां होवैगो ईंको निदान।

ईंक आगै सगळो मलक लाचार, अब थां ई संभाळो भगवान।।