बड़ का पान की गाड़ी बणांता,
कमली केसरो रैतो लार, धसूळा सूं केसरो गार खोदतो।
कमली भरती गाड़ी म गार, कदी खेलतो ऊ बड़ा हेत सूं॥
कदी करता एक दूजा प वार, मंदरसा म जाबा लाग्या जद।
पढ़ती टैम बैठता दोन्यूं लार। केसरो पढ़बा ग्यो सैर म॥
कमली संभाळअ घर को काम, घर वाळां नअ पढ़ाई छुड़ाई।
छूटग्यो कमली केसरा को सात, केसरो बी कमली नअ भूल्यो॥
कमली अब रैबा लागी उदास, बगत बेगो ई खायो पल्टो।
कमली केसरो होग्या मोट्यार, पढ़र केसरो पाछो आयो॥
कमली बी न्हाळ री ऊंकी बाट, रूपां सूं बी बत्ती लागै रूपाळी।
हर कोई छावै लेवै नजर उतार, बाळपणां का संगेती फेर मल्या॥
मलतांईं होगी आंख्यां च्यार, बड़ा हेत सूं सैर सूं लायो अंगूठी।
कमली न आंगळी म ली वाळ, बार बार नरखै परेमी की नसाणी॥
अंगूठी देखतांईं करै परेम न याद, जींने दी अंगूठी फेरबा की आंगळी म,
वूं दातार न कमली दियो बिसार।।
- तरक माण्डो