बादळी सावण की बरसै रै।

बादळी सावणकी बरसी रै सन्दीरात

मनड़ो तो थांकी यादां म लागै रै

यादां म लागै रै पिया थांकी यादां म लागै रै॥

सन्दी रात तो बरस रै बरखां

मनड़ो तो थांकी यादां म लागै रै।

बादळी सावण की बरसै रै (1)

समळ नअ समाळ्यां मन म्हारो अटि उटि यूं जावै

मनड़ो म्हारो बणर मोरियो हांस-हांसर क यूं बतलावै

आपण बातां तो कर लेंगा दन दो च्यार

मनड़ो तो थांकी यादां म लागै रै

बादळी सावण की बरसै रै (2)

टप टप कर यूं पड़अ बादळी मन का तार बजावै रै

उठे हिलोरां हिवड़ा माई प्यारा गीत सुणावै रै

अब आस तो जगावै जी बार-थ्वार

मनड़ो तो थांकी यादां म लागै रै बादळी सावण की (3)

बागां माई खिलग्या फुलड़ा पण मन म फूल नअ खिलरया

दन रात थांकी याद आरी मलबा क्यूं न आ रया

पिया सूद तो लेल्यो जी म्हारी आर

मनड़ो तो थाकीं यादां म लागै रै॥

बादळी सावण की बरसै रै (4)

कोयल कू के पपिया बोलै मन म आग लगावै

सावण का झूला न देख्या पिया थाकीं याद सतावअ

अजी पिया मलबा तो आवो जी एकबार

मनड़ो तो थाकीं यादां म लागै रै

बादळी सावण की बरसै रै सन्दी रात

मनड़ो तो थांकी यादां म लागै रै

बादळी सावण की बरसै रै॥