एक बार एक सिकारी न एक गाबा हाळी चड़ी क तांई पकड़्यो। चड़ी कतांई उनै एक पिन्जरा म मैलद्‍यो। घणा दन तांई तो चड़ी डरपी-डरपी अर दुखी री। पण बेगोसोक उनै टैम सूं समजोतो करल्यो। ऊ चड़ी न या बात भगवान की मनसा प छोड दी। पण दन म चड़ी कतांई गाणो गाबा को मन न होवै छो, पण उनै रात म गाणो गाबा की आदत पडकली। एक रात जद वा अपणा पिन्जरा म गाणो गारी छी। जद ई एक बागळ उड़ती होइ वां आइ अर ऊंका पिन्जरा प बैठगी। बागळ न खी। अरै बड़्‍या अवाज हाळी चड़ी, थारी अवाज उतनी बड़्या छै, जतनो थारो डील। पण थारी अवाज म एक दरद छै। अर ईकै अलावा थारैताइ म्हूं दन म गातो न सुणुं। तु रात म ई गावै छै अस्या क्यूं भाईली! गाबा हाळी चड़ी न जवाब द्‍यो। म्हारा गाणा की अवाज म ज्ये दरद छुप्यो छै। ऊंकी वजै सूं मूं आजाद कोइनै। एक टैम छो, जद म्हूं आजाद रै छी। अर आकास म उडअ छी। अर अपणी मनसा सूं खावै छी। आज पिन्जरा म डाल दी। यां तो ऊई खाणी पड़ै छै, ज्ये मालिक म्हारै तांई दे छै। अर री रात म गाबा की वजै, वा या छै क म्हूं दन का उजाळा म ऊ टैम पकड़ी गी छी। जद म्हूं गारी छी। सिकारी न म्हारै तांई गातो सुण्यो अर पकड़ ली। ई वजै सूं दन का उजाळा म म्हारो गाबा को मन न करै। पण या तो थनै जद बच्यार करणी छाइज्ये जद तू पैली बार पकड़ी गी छी। अर अब तो दन म न्ह गाबा सूं थारा तकदीर म कांई असर न पड़ै, क्यूंकि तू पिन्जरा म बन्द पड़ी छै। इमै दन म न गाबा की कोइ बात कोइनै, प्यारी चड़ी!

समजदार मनख करबा क पैली या सोचै छै। अर ना समज, मनख करबा क बाद सोचै छै।”

सिक्सा - करबा क पैली बच्यार करो, करबा क बाद मै बच्‍यार बुदिमान को काम कोइनै।