एक जंगळ म एक सांप रै छो। ऊ नतकेइ चड़्यां का अण्डा ऊन्दरा, अर मैंढका, अर खड़गोस जस्या फोरा-फोरा ज्यानबर न खार पेट भरै छो। ऊ आळसी बी घणो छो। एक ई ठाम प रैबा सूं सांप घणो मोटो बी होग्यो छो। जस्यां जस्यां ऊ ताकतवर बणतो ग्यो, उस्यां - उस्यां ऊंको घमण्ड बी बढतो ग्यो। एक दन सांप न बच्यार कर्यो। “ म्हूं जंगळ म सबसूं जादा ताकतवर छूं, इसूं म्हूं जंगळ को राजो छूं। अब म्हारै तांई मान अर आकार न देखर म्हनै कोइ लोठी ठाम प रैणी छाइज्ये। ई बात प बच्यार करैर ऊ एक बडा रूंकडा प रैबा लागग्यो। रूंकड़ा क गोडै चींट्या रै छी। रूंकड़ा प घणी सन्दी गार बी चपकरी छी। चींट्या न देखर सांप न नपरत को मुण्डो कर्यो। अर खी- “ या जिन्दगी म्हारै तांई पसन्द कोइनै, ऊं चींट्या क गोडै ग्यो अर बोल्यो क यो सुगलोपन म्हारै तांई पसन्द कोइनै ऊ गुस्सा म बांबी का गोडै ग्यो। अर चींट्यां सूं बोल्यो म्हूं नागा को राजो छूं ईं जंगळ को बी राजो छूं, म्हूं आदेस द्यू छूं क बेगीसीक ई गन्दगी न हटा अर चलती बण। सांप न देखर वां रैबा हाळा फोरा सूं फोरा ज्यानबर कांपबा लागग्या। पण छोटी चींट्या प सांप को कांई असर न पड़्यो। अर ईं बात न देखर सांप को रोस घणो बडग्यो। थोड़ी टैम बादमै चींट्या बांबी सूं खडअर बारै आई। अर सांप प चढर उनै काटबा लागगी। सांप न लाग्यो क जस्या तो ऊंका डील प हजारो कांटा चब्या होवै। अर सांप दूख की मार्यां घबराग्यो। घणी चींट्या उनै नोच नोचर खाबा लागगी चींट्या सूं पीछो छुडाबा क्ले अटी-उटी कळोटा मारबा लाग्यो, पण कांई फाईदो न्ह मल्यो, थोड़ी टैम पाछै सांप चींट्या सूं टकराबा लाग्यो। पण जादा दुख सूं ऊंकी वांई ज्यान खडगी। ऊंकै बाद बी चींट्या न साप कतांई न छोड्यो। अर सांप का नरम मांस न नचोड़र खागी। थोड़ी टैम पाछै सांप की हड्यां वां पड़ी छी। जीसूं खै छै क कोइन बी छोटो बडो मत समजो। घणा छोटा-छोटा मलैर बी घणी बडी तागत बण जावै छै।
सिक्सा - जीवन म कोइनै बी बडो छोटो न समजणी छाइज्ये।
- तरक माण्डो