एक खास्तगार छो। ऊंकै गोडै एक बकरो अर दो बैल छा। बैलां न ऊ माळ हांकबा म काम ले छो। दोनी बैल दनभर कड़ी मन्त करैर माळ की हंकाई करै छा। इक उल्टो बाकरा क कोई काम तो कोइनै छो। उ दनभर घूम फरैर हर-हरी घांस चरतो रै छो। खा पीर ऊ घणो मोटो तगड़ो होग्यो। या देखर बैल न बच्यार कर्यो क बाकरा क तो घणो मजो छै। कांई काम न करै अर दनभर अटी-उटी फरतो-खातो फरै छै। अर अटी बाकरो बैलां की दसा देखर बाकरो घणो दुखी होयो। क बच्यारा बैल सन्दा दन हळ क जुत्या रै। अर मालिक छै क बैलां प द्यान बी न दे। ऊ बैला क तांई सला देबो छावै छो। जीसूं यांको भलो हो सकै। एक दन दोनी बैल माळ जोतर्या छा। बाकरो वांई माळ क गोडै घास चरर्यो छो। दोनी बैला न माळ म हांकबा म घणी मैन्त करनी पड़री छी। दोनी बैल घणी मन्त करैर हांफर्या छा। या देखर बकरो मुरकता की अवाज म बोल्यो - भायाओ थां दोन्या न दन भर माळ म कड़ी मैन्त करैर देखर म्हारै तांई घणो दुख होवै छै। पण कांई कर्यो जा सकै छै, यो तो तकदीर को खेल छै, मारै तांई देखो, म्हारै गोडै दनभर चरबा क अलावा कोइ काम कोइनै, दनभर म्हूं मेदान म चरतो रूं छूं।
खास्तगार की लुगाइ माळ म जावै छै। अर म्हारै लेखै हरी पत्यां की गांस लेर आवै छै। थां दोनी तो म्हनै देखर जळता रैता होगा।
दोनी बैल छानमून बाकरा की बातां सुणता रै, जद खास्तगार की लुगाइ स्याम की माळ सूं काम करैर घरन आई तो बैला न देख्यो क खास्तगार की लुगाइ कोइ कसाई सूं पीसा लेर उनै ऊ बाकरा कतांई बेचरी छी। दोनी बैलां की आख्यां म आंसू आग्या। अर बच्यारा बैल बी कांइ कर सकै छा। उमै सूं एक बैल बोल्यो, हाई थारी तकदीर म तो योइ मण्डर्यो छै।
सिक्सा - जिंकी तकदीर म ज्ये मण्डर्यो छै ऊंइ मलै छै।
- तरक माण्डो