एक बार एक फकीर हज की जातरा क्ले जार्यो छो। तो उनै गेला म एक गनकड़ो अदमरी हालत म देख्यो। ऊंकै च्यारू पगा प सूं गाडी खडगी छी। अर गनकड़ो चाल न पार्यो छो। फकीर न द्या आई, पण उनै बच्यार कर्यो क म्हूं तो जातरा जार्यो छूं अर क्हां लेर-लेर फरतो रूंगु। फेर फकीर क मन म बच्यार आयो क ईंको यां कुण छै। कुण ईंकी मदत करैगो। अर फकीर क मन म द्या आगी। फकीर न गनकड़ा ई एक क्वा प लेजाबा क्लें गनकड़ा ई उठाल्यो अर थोड़ा पाणी सूं ऊंका घाव न धोर ऊपै पाट्टी बान्द दी। फकीर न ई बात की बी फकर कोइन छी क गनकड़ा का घाव म घणो लोई बैर्यो छो। जीसूं फकीर का लत्ता भण्डग्या छा। ऊ टैम की ऊ रेगिस्तान सूं खडर्यो छो। वां उनै एक सूनसान क्वो देख्यो। पण क्वा सूं पाणी खाडबा क्ले कोइ डोरी या बरो कोइनै छो। उनै दो च्यार पत्ता भेळा करैर एक दुनो बनायो, अपणी पगड़ी सूं बान्दर दूना क तांई क्वा क तळअ लटकायो अर पण पाणी घणो तळअ छो। दूनो वां पूग न पायो। उन सात मै अपणी कमीज बान्द दी, पण फेर बी दूनो पाणी का तळै तांई न पूग पायो। उनै अटी-उंटी देख्यो पण कोइ न दिख्यो। पण फेर ऊ फकीर न अपणी सलवार उतार बान्द दी। जद वै दूनो पाणी तांई पूग पायो। उन दो च्यार दूना पाणी का भरैर गनकड़ा ई प्वायो। पाणी पीताई गनकड़ा न होस आग्यो। फकीर न गनकड़ा का घाव बी धोर साफ करद्यो। अर गनकड़ा न उठार चाल बण्यो। गेला म एक मजार मली। ऊ फकीर न मुल्ला सूं खी क तु ई गनकड़ा को ख्याल राखज्ये। म्हूं हज की जातरा (काबे) जार्यो छूं अर पाछो आर ई गनकड़ा कतांई ले ल्युंगु। जाता जाता उनै रात होगी। जद ऊ रात म सोयो तो एक आकासबाणी बोली:- हे नेक फकीर थारी हज की जातरा कबूल होगी। अब तू हज की जातरा जा या न जा थारी मरजी
सिकसा:- बेजूबान ज्यानवर ब ऊ खुदा न ई बणायो छै, ऊंकी सायता करबो घणी बड़ी बात छै।
- तरक माण्डो