कोटा क गोडै एक गांऊ म एक खास्तगार को परवार रै छो। ज्ये खेती बाड़ी करैर अपणी जिन्दगी जिवै छो। ऊ खास्तगार क एक छोरो छो। जिको नांऊ सोहन छो। ऊ बी खेती बाड़ी म अपणा भाईजीको सात दे छो। खास्तगार का परवार सन्दा बरस आलू की फसल उगावै छो। ऊंका भाईजी सन्दा माळ न हांकै छा। सोहन की मांई अर सोहन मलर छोटी छोटी क्यार्यां की कतारा म बीज पटकै छा। अर फेर ऊंकै अदर्यास खात कतांई भखेलर पटकै छा। खात पटकबा क पाछै ऊ क्यार्या न गार सूं भर दे छा। बड़्‍या देखरेख अर पाणी प्वाबा क बादमै व बीज लोटा लोटा आलू बण जावै छा। आलू की खेती की टैम सोहन का भाईजी न एक ग्यान की बात बताई। सोहन थनै देखी क एक फोरो बीज कतनो बडो आलू बण जावै छै। फेर आलू सूं नाळो-नाळो तरै को खाणो बणाव छां। ईंकी नाइ आपणा ब्वार बी अस्या ई पाकर बणै छै। आपणा सन्दा बच्‍यार अर आपणी सन्दी बातां एक बीज की नाइ होवै छै। ज्ये टैम की लारा पाक जावै छै। नाळी-नाळी हालत म ऊ बीज क्ले खाद बण जावै छै। पाणी को जद टैम होवै छै ईंको मल्‍लब यो छै आपणा जीवन म ज्ये पावां छां। ऊंका बीज आपणा घणी टैम पैली आपणा जीवन म बो द्‍यांछां। आबाणूं का करम क नूसार आगै का टैम म आपणै तांई फळ मलै छै। आपणो आबाणु को टैम ऊ माळ की नाइ छै ज्ये एक नुइ फसल उगाबा क्ले एक दम त्यार छै। अगर आबाणु आपण बड़्या करंगा, बड़्या खात पटकंगा तो बड़्या फसल मलैगी।

सिक्सा :- जस्यो बीज आपण आपणी जिन्दगी म बोवै छां, एक दन वाइ फसल बणर आपण सामन आवै छै।