एक टैम एक सादू बजार म होर जार्यो छो। गेला म एक मनख खजूर बेचर्यो छो। ऊ सादू का मन म एक बच्यार आयो। क खजूर लेणी छाईज्ये पण सादू न अपणा मन ई समजायो। अर वांसूं चलग्यो। पण सादू सन्दी रात न सोया। सादू तड़कै उठर जंगळ म चलग्यो, अर बडी मोळी वानै उठाई। ऊ सादू न अपणा मन सूं खी, अगर थनै खजूर खाणा छै तो या बडी मोळी को बोज उठाणी पड़ैगो। सन्त माराज थोड़ी दूर चालै अर गरज्या फेर चालै अर फेर गरज्या वामै एक लकड़ी की मोळी उठाबा की दम कोइनै छी, पण वानै लकड़ी की दो मोळी उठार दो कोस दूर सूं बजार म चलग्या। अर लकड़ी न बेचर ज्ये पीसा आया वांकी खजूर ले ली। खजूर न सामै देखअर सादू को मन घणो खुस होयो। सादू न वा पीसा सूं खजूर खरीद्‍या। पण सादू न मन सूं खी, आज थनै खजूर मांग्या छै, काल फेर थारी नुइ मनसा होवैगी। काल सूं तू नया-नया लत्‍ता अर लुगाई बी मांगगो। अर लुगाई आई तो छोरा-छोरी बी होवैगा। जद तो म्हूं सन्दा आडी सूं थारो गुलाम ही बणजांऊ। सादू कूटिया क बारै खड्‍यो। तो वानै गर्याळा म एक मनख दूसरा गांऊ म जातो दिख्यो। ऊ मनख ई बलार सन्दी खजूर ऊकैतांइ दे दी। अर खुद मन को गुलाम बणबा सूं बचग्यो।

सिक्सा - मन को खैबो न मानै तो जिन्दगी को फाइदो उठा सकै छां। अर मन की सुणा तो मन को गुलाम बण रै जाऊगां।