एक खास्तगार ऊंकी ज्याग क आडी जार्यो छो। थोड़ो ई दूर चाल्यो छो, क गेला म एक बड़्या फागड़ी पड़ी देखी। राता रंग की फागड़ी अर ऊंकी बणाइ तो फागड़ी क च्यार चान्द लागर्या छा, आगै-पाछै देखर उन वा फागड़ी अपणा माथा प धरली। अर सीनो तांणर स्यान सूं ज्याग क आडी चाल बण्यो। ई फागड़ी न देखर सन्दा मनख जळबा लागज्यागा। खास्तगार थोड़ो ई दूर ग्यो छो क ऊ फागड़ी प तीन चोळ्डा की नजर पड़ी। वानै बच्यार कर्यो क ई गरीब खास्तगार क गोडै अतनी सुन्दर बड़्या फागड़ी खांसूं आई। वामै सूं एक चोळ्डो खास्तगार क गोडै ग्यो अर पूंछबा लाग्यो क थनै अतनी बड़्या फागड़ी खांसू मली। तो खास्तगार न जवाब द्यो, क म्हनै फागड़ी गेला म पड़ी मली छै। फेर कांई छो तीनूं चोळ्डा न फागड़ी कुसकाबा की एक योजना बणाई। थोड़ो दूर ई ग्यो छो एक चोळ्डा न खास्तगार क गोडै आर खै छै क “ अरै दादा या थाणदारजी की फागड़ी थारै गोडै, थन चोर तो न ली “या सुणर खास्तगार न घबरार जवाब द्यो “न भाई, या तो मारतांई गेला म पड़ी मली छी। थोड़ो आगै चाल्यो क दूसरो चोळ्डो गोडै आर बोल्यो“अरै काका, तू तो घणो ताकतवर खड्यो थन तो थाणादार की फागड़ी प हात मारल्यो“अब कांई छो, खास्तगार घणो डरपग्यो अर चालता- चालता न फागड़ी उतार हात म लेली। ऊंकी ज्याग क गोडै जाबाळो ई छो। क तीसरो चोळ्डो भागतो होयो गोडै आयो अर खास्तगार सूं बोल्यो ”काका भाग थाणादार जी अर सपाई अटी आर्या छै। डरपर खास्तगार न वा फागड़ी वांई फांक दी। अर वांसूं भागग्यो। चोळ्डां न वा फागड़ी उठाई अर खास्तगार की मजाक उडाता भागग्या।
सिक्सा- कोइ का बी झूंठा बैकाबा सूं बचो।
- तरक माण्डो