एक बार जांहपना अकबर न बीरबल सूं खी बीरबल अविद्या (ज्ञान की कमी) कांई छै। बीरबल न खी माराज ई सवाल को जवाब देबा क्ले म्हारै तांई च्यार दन की छुट्टी लेणी पड़ैगी। तो अकबर न च्यार दन की छुट्टी क्यूं तो बीरबल न खी म्हूं परेसान होग्यो थांका सवाला का जवाब देतो-देतो। सवाल को जवाब देता-देता दिमाग थकग्यो। दिमाग क तांई आराम छावै छै। च्यार दन पाछै जद पाछो आऊं जद पक्को बताऊं क अविद्या कांई छै। अकबर न खी जस्या थनै मंजूर होवै। बीरबल क तांई च्यार दना की छुट्यां मलगी। ऊ सीदो ज्याग न ग्यो अर ज्याग सूं मोची (चमार) क गोडै ग्यो अर बोल्यो एक असी सानदार रूपाळी जूत्यां बणा ज्ये क कोइ देखै तो देखतो ई रैज्या अर फेर मोची बोल्यो कस्या नाप की बणाणी छै। थोड़ो नाप वाप बतावो तो बीरबल बोल्यो नाप वाप कांई कोइन एक बंअत चोड़ी अर दो बंअत लम्बी बणा दै आराम सूं सानदार हाळी बणादै। थनै जतनो टैम लेणो वै पण जूत्यां म हीरा जेवरात जड़नी छावै छै। अर सोना चान्दी की सिलाई होणी छाईज्ये। असी जूत्यां बणाणी छै ज्ये बस मनक्यां का मुण्डा सूं वा ई खडअ। तो मोची न खी जनाब बणा खी क्ले बणार्या छो। बीरबल न जादा सवाल जबाब मत कर अर बणाबा क बादमै या भूल जा ज्ये क थनै बणाई छै या ई सरत छै। मोची न खी मंजूर छै। तीन दन बादमै मोची न जूत्यां बणादी बीरबल ग्यो रप्या द्या अर फेर बोल्यो कोइ सूं बोलज्ये मत क थनै बणाई छै। बीरबल एक जूती अपणी ज्याग म मैलदी अर दूसरी जूती मज्जित म फकवा दी। तड़कै-तड़कै मोली साब नमाज पढबा क्ले पोछ्या तो वा वानै वा जूती दिख्याइ दी। हिरा जेवरात सूं जड़ी सोना चान्दी का तारो सूं सिलाइ जड़ी होइ। मोली साब न बच्यार कर्यो क कोइ सादा मनख की तो या जूती न हो सकै पण वान लाग्यो क जरूर ऊपर हाळा(मालिक) यां नमाज पढबा मज्जित म आयो होवैगो अर भूल सूं वांकी जूती यांई भूलग्या। मोली साब न वा जूत्यां उठाई अर अपणी आख्यां सूं लगाई अर मूण्डा सूं चूमी अर माथा प लगाई ऊक बादमै वां ज्ये बी मनख नमाज पढ़बा आर्या छा वां सन्दा मनक्यां क तांई बताई क या जूती आम मनख की कोइन ऊपर हाळा की छै। मनक्यां न बोली सई बात छै। जनाब सचमुच सई बोल र्या छो। जनाब सचमुच ऊपर हाळा की छै। हर कोइनै सन्दा न ऊकतांई चूम्यो माथा प धर ली। ऊक बाद या बात जंगळ म ला की नाई फैलगी। अकबर कतांई या बात पोछी। जांहपना अकबर न
बोली जूती म्हारै गोडै लार दखाई जावै। जूती लाई गी। अकबर न देखी तो बोला बिलकुल सई बोर्या छो। ये यां कोइ सादा मनख की जूती न हो सक। जरूर ऊपर हाळा की छै। ऊपर हाळो पिनै आयो होवैगो नमाज पढ़ी होवैगी। अर जूती छूटगी होवैगी अर वानै बी वाई करी। माथा प लगाई अर मूण्डा सूं चूम्यो अर माथा प धरी ऊकै बाद खी अकबर न खी क नायब जूती छै। ईनै ले जार बड़्या ठाम प धरद्यो अर ईंकी पूजा करो। ईंकी पूजा होणी छाईज्ये बड़्या सूं ध्यान राखज्यो। यो थानै करणो छै। अकबर को आदेस मान्यो ग्यो। अटी च्यार दन की बीरबल की छुट्यां खतम होगी छी। बीरबल दूबारा आयो तो मुण्डो लटक्यो होयो दुखी-दुखी अकबर न पूंछी कस्यां दुखी छै। अस्यो लागर्यो क जस्यां ज्याग न कोइ मरग्यो होवै। तो बीरबल न खी कांई बताऊ मालकसाब म्हांकी ज्याग न म्हारै दा’जी की जूत्यां छी। चोळ्डा आया अर एक जूती न उठार लेग्या अर एक न छोडग्या म्हां घणी दिक्कत म चालर्या छा। म्हाकै दिल क अतनी गोडै छी क म्हानै आजतांई वांकतांई न बेच्यो। बस आपण न समाळर धर मैली छी। तो अकबर न बीरबल सूं खी थारै गोडै वा जूती छै हाजी जी हा आबाणूं थानै दखाऊं छूं। तो बीरबल न जूती देखी अकबर को माथो दूखबा लाग्यो अर अकबर न खी वा ज्ये जूती रखाई वा मंगवावो तो जूती मंगवाई गी। जूत्यां को जोड़ो बणग्यो। अर बीरबल कतांई दी अर बीरबल न खी माराज या छै अविद्या न थानै कांई पतो अर वानै कांई पतो कोइनै छो अर जिन मैली ऊनै बी कांई पतो कोइनै छो। सन्दा गाडर (भेड़) की चाल चालर्या छा। ईसूं कै छै अविद्या। या ख्यांणी भीड़ म चालबाळा की छै।
- तरक माण्डो