एक रादेस्याम नाऊं का एक गरूजी छा। वै रैलगाडी म नतकेइ सपर करै छा। अर अपणा ओपिस म नतकेइ आवै छा अर जावै छा। अर नतकेइ रैलगाडी का सपर सूं वै कांई न कांई सीखअ छा। अर ज्याग न आर अपणी नतकेइ की डायरी म माण्डै छा। एक दन ओपिस जार्यो छा तो वानै रैलगाडी म वांकी सीट क सामनै एक परवार बैठ्यो छो। सन्दा बातचीत कर्या छा जद ई एक छोरो पाणी की बोतल बेचबाळो खडर्यो छो अर जोर सूं अवाज देर्यो छो। सामनै बैठ्या परवार मैसूं एक भाईसाब न पूंछी क बेटा एक बोतल कतना की छै। तो छोरा न खी बीस रप्या की तो भाईसाब न खी क बोतल पन्दरा रप्या की दै बीस म कांई बेचर्यो छै पन्दरा म दै। पाणी बेचबाळो कांई न बोल्यो अर ऊ मनख क आडी हांसर खडग्यो अर कांई न बोल्यो आगै बडग्यो। अर या बात सामनै बैठ्या रादेस्याम गरू जी देखर्या छा। वै सन्दी बात अपनी नतकेइ की डायरी म माण्डै छा। क आज आपण न कांई सीख्यो या बात मलाडी सूं जाणबा की मनसा होइ अर बच्यार कर्यो आज यो आपणतांई कांई न कांई बात सीखबा म मलैगी, क छोरो जिन्दगी म हांसर कस्यां चलग्यो अर बैस न्ह करी। अर गरू जी फटाफट ऊ छोरा क पाछै पाछै चलग्या अर ऊ छोरो बी रैलगाडी का एक डब्बा सूं दूसरा डब्बा म आगै बडग्यो छो। गरू जी न पाणी बेचतो हुयो ऊ छोरा कतांई रोक्यो अर खी बेटा तसूं एक बात पूंछबो छार्यो छूं। तू आबाणू म्हारा डब्बा म एक परवार छो वामै एक मनख बोलर्यो छो पाणी की पन्दरा रप्या की एक बोतल बीस म कांई बेचर्यो छै थू ऊ टअम कांई न बोल्यो अस्या क्यूं तू छानमून आगै बडग्यो मल्लब थनै रोस नायो अर खी दो-पांच रप्या कतांई जिद करर्यो छै। साब ऊनै पाणी पिणो कोइनै छो ऊनै थस न्ह लागरी छी। तू कांई अन्तरयामी छै ज्ये थारैतांई पतो चालग्यो। वानै पाणी न्ह पिणो कोइनै हो सकै छै वानै तस लागरी होवै। तो दूबारा छोरो बोल्यो अर खी क वानै तस न लागरी छी ज्यानै थस लागै छै पैली पाणी की बोतल ले छै अर ऊनै पिवै छै ऊकै बाद भाव करावै छै। अर पिस्सा दे दे छै। फालतू की बअस न्ह
करै। ऊ छोरा न जद यो जवाब द्यो अर वानै या बात ज्याग न जार अपणी डायरी म माण्डी अर वानै माण्डी क जिन्दगी म अगर आपण न लकस्य बणाल्यो अगर आपणा दिमाग म बात पक्की छै तो आपण फालतू लड़ाई झगड़ा म न पड़ा पण आपणो लकस्य पक्को कोइनै तो आपण न पतो ई कोइन क कांई करणो छै
तो आपण न घणी कम्यां ऊ लकस्य म जिन्दगी का लकस्य म खाड लेंगा। अर बस ईनै छार बी टैम न बरबाद कर देंगा। खासकर ज्ये पढबाळा छोरा ई ख्यांणी न पढर्या छै। म्हूं वानै बोलबो छार्यो छूं। अपणा लकस्य न पक्को करै अगर थांका दिमाग म पक्को कोइनै क थानै कांई करणो छै। तो थां तीन च्यार सवाल म ई उळझर रै जावैगा। बरस प बरस खडज्यागा पण फेर बी थानै मैसूस होवैगो क टैम तो जद छो ज्ये आपण न कांई बरबाद करद्यो। जिसूं अपणो लकस्य पक्को करो जिसूं लड़ाई झगड़ा की नोबत ई न आवैगी।
- तरक माण्डो