एक गरुजी की टापरी म एक नयो चेलो आयो। ऊ गरगड्‍या लेबा क तांई वांकी टापरी म रैबा लागग्यो। एक दन बाबाजी न चेला सूं खी। म्हूं थोड़ा घणा दना क क्ले पला गांऊ म जार्यो छूं। थू यांई रीजे अर आपणी टापरी की रूकाळी करजे। अर एक बात सदा द्‍यान राखजे। कि कदी बी आपणी टापरी म अंदेरो न होणी छाव छै। चेला न की ठीक छै गरुजी। अब गरुजी चलग्या थोड़ी घणी टैम पाछै दन आंथग्यो। अर टापरी म अंदेरो होग्यो। अब चेलो कांई करै ऊंई तो याबी याद कोइन क उजाळो कस्यां होव छै। उनै एक कामड़ी ली अर अंदेरा क देबा लागग्यो पण उसूं उजाळो न होयो। बच्यारो आखी रात कामड़ी सूं अंदेरा क देतो-देतो थाकग्यो, पण ऊ अंदेरो न मट्‍यो। दन उगता-उगता गरुजी आग्या तो वान देख्यो। क चेला का हात म लीलां उघड़ री छी अर ऊ कामड़ी न लेर अंदेरा ई भगाबा क तांई लागर्यो छो। बाबाजी न उसूं की, अरै म्हारा चेला यो थू कांई करर्यो छै। तो चेला न खी क गरुजी म्‍हन सन्दी तानी सूं कोसिस करली पण आखी रात होगी ई अंदेरा ई भगाता-भगाता पण यो तो जावै ई कोइन। मई थां बगसद्‍यो। तो बाबाजी न खी क कोइ बात कोइ न। वान एक द्‍यो खाड्‍यो अर डाबी सूं द्‍यो जळायो अस्यान म आखी टापरी म उजाळो ई उजाळो होग्यो। तो बाबाजी कै छै मनख ई ऊंको जमारो सूदारणो होवै तो उम ग्यान होबो जरुरी छै। जब जार उजाळो हो सक छै।