1. जिन्दगी मअ बरो टअम नावअ, तो आपणा मअ पराया अर पराया मअ आपणा कदी बी नअ दिखअ।
2. काच्ची ज्याग देखर कोई सूं बी ब्वार मत तोड़ज्यो भाईलाओं, मारतांई तजूरबो छअ, गार की पकड़ घण गाढी रअ छअ, संगमरमर का भाटा पअ तो पग रफट जाव छअ।
3. दुसमण सूं घणो खराब छअ, ऊ मनक, ज्यो भाईलो बणर धोखो दे छअ।
4. वां मनक्या नअ कदी नअ भूलो ज्यानअ थाखो सात जद द्यो, जद थांकअ गोडअ कोई बी कोई नअ छो।
5. पग मअ कांटो अर रिसता मअ बअम एक बार गुसबा कअ बाद ज्यातांई ऊ पूरो नअ खडज्या ज्यातांई चूबतो अर दूख देतो रअ छअ।
6. बडो मनक ऊ होवअ छअ, जिकअ गोडअ सबसूं जादा वअ चीजा रअ छअ, जे पीसा सूं नअ ले सका।
7. बरा टअम मअ ढांडस देबा आळा कोइ अणजाण बी होवअ तो ऊ काळज्या मअ बस जावअ छअ।
8. बरा टअम पअ कोई सात छोड़बा सूं भल्याईं आपणो का नअ होवअ काळज्या सूं ऊतर जाव छअ।
9. अगर थां ऊ टअम हासग्या जि टअम थां सन्दी आढी सूं टूटग्या होवअ। तो थां खूद कअ ऊपर बस्वास करल्यो कअ थानअ कोई नअ तोड़ सकअ।
10. पीसो बी कांई छअ, जस्याई आवअ ऊ मनक खूद कअतांई भूल जावअ छअ, अर जावअ तो जमानो ऊकअतांई भूल जावअ छअ।।
11. दो मनक्यां कअ बीच मअ ब्वार सदा तीसरा मनक सूं बगड़अ छअ।
12. जस्यां थाखो मन टूटबा लागअ, तो या आस राखो कअ ऊजाळा की कोई नअ कोई एक करण कानकां सूं आवअगी। अर थाखतांई डूबबा सूं बचावअगी। अर थां पार लाग ज्यागा धीरप राखो।
13. ब्वार नअ कदी नअ तोड़नी छावअ छअ, पण ज्यां कदर नअ होवअ वां निभायो बी नअ जावअ।
14. सदा वांकअ अदर्यास करजदार रणी छावअ छअ, जे थांकअ लेकअ टअम नअ देखअ, अर सदा उसूं वफादार रअणी छाव ज्ये काम करतो रअ पण थांकअताई टअम दे।
15. आगअ बढणो छअ तो बरा बण जावो, थोड़ा मनक्या नअ छोड़र तो बाकी सन्दा मनक होसळो गराबाळा रअ छअ।
16. टअम सूं यारी हर कोई कर ले छअ, मजो तो जद छअ जद टअम बदल जावअ अर यार नअ बदलअ।
17. मनक तळ बअठ्यो रप्या गण बी करअ छअ। कअ काल अतना, आज अतना, अर अदर्यास हाळो हांसबी करअ छअ, कअ मनक की सांसा गणअ छअ कअ, काल अतनी छी अर आज अतनी थोड़ी रअगी।
18. जि उमर मअ जो करबा को मन होवअ, ऊ कर लेणी छावअ छअ, नअ तो जिंदगी मअ काम बढ जावअ छअ।
19. सांचा भाईला का तीन गुण-बराई नअ रोकबो, ऊकी भलाई सोचबो, दुख मअ सात नअ छोड़बो।
20. भर्यो केसो थांकअताई गलत गेला पअ लेजा सकअ छअ, पण खाळी जेब जिंदगी को घणा माईना सिखा दे छअ।
21. ब्वार उसूं इ बणावो जो नभाबा की ओकात राखअ। कोई की बराई करबा सूं या पछाण होजावअ छअ। कअ थांको मनक कस्या को छअ।
22. अगर थांकी जिन्दगी मअ काई बी दिक्कत आवअ तो समज लिज्यो कअ थांको मालिक थांकतांई जिताबो छार्यो छअ।
23. काम करबा मअ जनून होणी छाव छअ। मसीबतां की कांई ओकात।
24. अपणा हस्याब सूं जिन्दगी जिणी छावअ छअ, मनक्यां को कांई वो तो टअम का हस्याब सूं बदलता रअ छअ।
25. अगर चाई मअ माखी गर जावअ तो चाइ नअ फांक द्यां छा। अगर घी मअ गरअ तो मांखी नअ फांक द्या छा।
26. म्हूं म्हारी जिन्दगी मअ सब कअतांई इज्जत द्यूं छूं। क्यूंकि जो बड़्या होवअगो ऊ सात देवअगो। अर जो बरो होवअगो ऊ सबक देवअगो।
27. आज छांवळी सूं पूंछी क्यूं चालअ छअ तू म्हारी लारां तो छांवळी नअ खी कअ कूण छअ थारी लारां।
28. मसाणा की बानी नअ देखर एक बच्यार आवअ छअ, कअ बानी होबा कअ लेकअ मनक जीवन भर दूसरां सूं कतनो जळ छअ।
29. सन्दी जिन्दगी मअ एक बात सीखी छअ, आपण नअ आपणा मनक्यां कअ सोड़अ रअणो छअ।
30. लांबी जबान अर लम्बो तागो सन्दी बार उळझ जावअ छअ परेसाणी सूं नमटबा कअताई तागा कअतांई लपेटर राखणी छाव छअ अर जबान नअ बसमअ।
31. जिकअतांई मूण्डा की बायरी लागज्या ऊकअतांई नअ तो दवाई लागअ नअ दूवा लागअ।
32. जिन्दगी भर तो कोई सात नअ दे या जाणग्या, मनक जद ई याद करअ छअ जद खूद अकेलो होवअ।
33. खुद की भलाई क्ले कोई नावअ पण जद था ठाण लेगा जबई था भलाई कर लेगा।
34. पअड्यां पअ चढबाळो मनक झुकरअ चालअ छअ। अगर कोई झूकर चालर्यो छअ तो ऊ अदर्यास बडर्यो छअ। अर कोई अकड़ मअ चालर्यो छअ तो पिनअ जार्यो छअ।
35. खूद पअ बस्वास करबा को हूनर सीखल्यो। सात देबाळा कतनाई बस्वास करबा मअ एक दन वअ बी सात छोड़ द्य छअ।
36. भगवान मां-बाप दोन्या सूं बड़ा होवअ छअ, भगवान सुख अर दुख दोनी नअ दे, पण मां - बाप सुख ई दे छअ।
37. कड़ी मअन्त सूं मत घबरावो, मअन्त की टअम पअ मनक अकेलो रअ छअ सफल होबा कअ बादमअ तो सन्दी दूनिया ऊंकी लारां होजाव छअ।
38. एक सअद छअ जिनअ हजारो बरस बादमअ बी आपण उनअ खा सकअ छा। अर सअद छअ जस्सी बोली सूं बरस बरसातांई मनक्या का दिला पअ राज कर सकअ छअ।
39. जिन्दगी जीबा कअ तांई मली छअ, अर मनक ऊंकअतांई सोचबा मअ बिताद्य छअ।
40. म्हनअ बी छोड़्यो किस्मत पअ बस्वास करबो, क्यूंकी मनक बदल ज्या छअ तो किस्मत कांई चीज छअ।
41. मेदान मअ हार्यो मनक दूबारा जीत सकअ छअ, पण मन सूं हार्यो मनक कदी नअ जीत सकअ। थांको बस्वास ई थांकी पूंजी छअ।
42. अगर बाळक कअ तांई थोड़ी टअम खेलअकणो नअ दे तो थोड़ी टअम ई रोवअगो, पण बड्या संस्कार नअ द्य तो ऊ पूरी जिन्दगी ई रोवअगो।
43. कस्या लत्ता पअनू जीसूं म्हूं बड़्या लागू ई बात आपण नतकेई बच्यार करां छा, पण कस्यो अस्यो करम करू जींसू भगवान कअ तांई म्हूं बड़्या लागू, या बात कोई, नअ सोचअ।
44. रोस की टअम थोड़ा रुक जावो अर गलती की टअम थोड़ा झुक जावो, तो दूनिया मअ मसीबतां को हल छअ।
45. टअम बदल छअ जिन्दगी बदल दे छअ, जिन्दगी बदल छअ टअम कअ लारां लारां, टअम नअ बदलअ आपण कअ लारां, बस आपणा बदलता टअम की लारां।
46. टअम दिखअ कोई नअ पर दिखा सब दे छअ।
47. टअम सबकअतांई मलअ छअ जीवन बदलबा कअतांई पण जिंदगी नअ मलअ टअम बदलबा कअतांई।
48. नन्दी मअ गरबा सूं कोई की ज्यान नअ जावअ, ज्यान जद जावअ छअ जद तरणी नावअ दिक्कत कदी परेसानी नअ बणअ परेसानी जद बणअ छअ जद दिक्कत सूं नमटबो नावअ।
49. डूबअ तो पाणी नअ दोस दे छअ, गरअ छअ तो भाटा कअ तांई दोस दे छअ, मनक बी बड़ो अजीब छअ, अर कांई नअ कर पावअ तो नसीब नअ दोस दे छअ।
50. स्याम, सूरज कअ तांई डूबबो सखावअ छअ, गरबाळा नअ परेसाणी होवअ छअ, पण ठोखर ई मनक नअ चालबो सखावअ छअ।
- तरक माण्डो